顯示具有 0027 銀河娛樂 標籤的文章。 顯示所有文章
顯示具有 0027 銀河娛樂 標籤的文章。 顯示所有文章

2023年9月10日 星期日

為換馬做準備

最近考慮投資上嘅方向之後,檢視了自己手上的組合,感覺上需要整理一下。以下只係自己嘅虛擬組合作出嘅操作,不構成任何投資建議或邀約。在這種咩股都跌嘅情況之下,選擇咗賣出銀娛,盈富,置富。其實自己都想好了會換碼去邊幾隻股票到,在這𥚃想記錄返幾隻股票自己嘅買入初心同埋賣出原因。


1.盈富基金
首先是盈富基金,本身買入佢嘅諗法只係同大市同步,又會被動咁派股息。因為佢會被動式咁選最好嘅50只股票納入基金,不過近年來佢哋操作同埋規則有所改變,例如喺科技股最高位嘅時候將佢哋納入恆生指數,睇返佢哋嘅選股機制,發現原來佢哋嘅選股唔係被動選擇而係人為選擇。咁即是未必同一把尺,像以往一樣去選股到指數。另外,指數成份股嘅數目增加令到納入指數入面嘅股票數目變多,就好似之前文章所講嘅增加大學學位令到所有人都係大學生的比喻。即係將龍門擴大,令多啲公司可以入到指數,即使佢哋嘅盈利能力或市值未達到客觀嘅要求。這樣跟我本身買被動型基金嘅初心已經有所唔同,所以決定同佢講拜拜。可能我已經喺動作比較慢嗰個啦,哈哈。在大市咁差嘅情況之下賣出,可能係一個蝕本嘅操作,不過我相信而家唔止蝕,往後對佢嘅期望都唔會太大。

不過,盈富基金俾我有一啲學習嘅地方,就係需要分辨大市嘅平同埋貴而作出買入賣出嘅策略,而唔係單純咁係儲股票。例如因為中美貿易戰嘅利好消息而令股價短時間(1至2個月內發生)急速上升,呢個時候應該賣出及停止月供股票,等待下一個時機。就係等市場冷靜返,或者下一個壞消息出嘅時候就會回落。到時候先繼續月供股票。如果急升嘅時候咩都唔做嘅話,就會只係紙上富貴過,過眼雲煙。


2.銀河娛樂
另外就係銀娛,本身買入時看好佢在澳門橫琴嘅土地儲備,往後澳門要發展嘅時候,佢應該會係最受惠的一個,加上佢續牌應該唔會有政策風險,而且賭業係好賺錢嘅行業,因為賭仔十賭九輸呀嘛,咁梗係買佢對家啦。同時銀娛之前嘅酒店娛樂發展項目都做得唔錯,所以都想過長遠持有,等待橫琴發展嘅一日就係收成嘅時間。

不過現在大環境上有不同,整體嘅經濟變差,拎去娛樂或者賭博嘅錢,未必會有以前咁多。再者企業要發展新項目就需要借貸,在加息週期嘅舉債都係不利的,等佢減息借到平錢發展。雖然銀娛嘅現金儲備都好多,不過大環境暫時好似唔係好就佢。其實我都幾中意呢一只股票,覺得佢都仲係好有發展嘅潛力,不過現在大環境咁嘅時勢,呢隻股票喺我個組合入邊並不牆身現金流。與自己目前的投資目標(增加個人現金流)唔係好配合,所以都要跟呢只股票講有緣再見啦。遲下再睇有冇機會買返。

呢一隻都有操作上學習嘅地方,喺年初炒通關嘅時候佢嘅股價短時間上到去70幾蚊,果時自己又係蠢咗,咩都唔做,明明知道佢係一個急升,都只係坐喺度,沒有操作。變成曾經嘅紙上富貴,好蝕底。


3.置富信託
最後就係置富信託,其實買入嘅初心真係為咗收息,因為佢嘅業務好簡單,就係一隻收租嘅股票,加上佢以信託形式上市,一定會將可分派現金嘅九成派發出嚟作為股息。佢旗下好幾個商場物業自己都有不時經過,雖然唔係話好旺場,但自己就中意佢嘅定位在民生商場同埋停車場多,唔係一啲寫字樓嘅資產。當時買入嘅時候都有六釐息,自己都幾滿意個回報嘅。買咗佢就當自己係一個收租佬,唔會理股價升跌炒出炒入。係組合內一隻增加現金流嘅股票。

不過大環境係加息週期 收息股都會跌落嚟,除咗置富信託之外,好多收息股都跌咗好多,我會諗吓其實同一筆資金係唔係有其他更好嘅股票可以買入作長線投資呢?諗返置富嘅加租能力其實比起其他大型商場比較低,而且有啲重點商場仍然喺度翻新緊,其餘商場嘅質素比起其他大型商場又冇咁好。咁即係話當個經濟逆轉嘅時候,其他商場嘅租金升幅會俾置富更加大,議價能力都俾佢高。我覺得唔應該死守呢一只信託股票,而應該換碼去其他更加好既股票等待市場逆轉嘅時候。

即係加息見頂或者開始減息嘅時候,其他更大型嘅信託股票或者地產收租股,升幅及回報應該更加大。可能外資返嚟嘅時候,其他更優質嘅股票升幅應該會比置富更好。

呢只股票都學識咗一樣嘢,就係要睇佢升既原因係咩。仲好記得快當時第一次買入嘅時候咁啱喺中美貿易戰發生緊,所有嘅收息股或者主要收入喺香港或者中國內部就搵會升曬上去。因為個個都驚唔知道美國有咩手段再打壓,市場嘅避險情緒好高, 所以資金流入去呢一啲簡單嘅收息股,其實當時呢個買入決定係錯,因為時機係唔啱。應該等個市場唔係焦點在呢種類股票嘅時候先慢慢買貨。


整體考慮
自己都諗好咗投資目標,就係要增加個人現金流,現在好多股票都跌咗落嚟,好希望喺加息嘅週期入面儲多一啲有穩定盈利又會派發股息嘅股票,坐住等下一個減息週期。「儲資產,增加現金流」做好防守個一部份當然,令資金回籠的速度增加。在往日子即使要買些增長股出錯了都還有返生的機會。沒有一間企業可以應承你有穩定嘅盈利同穩定嘅派息,事情總會有黑天鵝事件,所以只可以喺注碼上面控制好,考慮自己可以承受嘅風險有幾多。當然我都諗抽一小部份嘅注碼出嚟,買入啲大型嘅科技股,因為佢哋就係下一個減息週期嘅受惠者。

#資料僅供參考用途,在任何情況下不構成任何投資建議,只是小弟作紀錄之用,千萬不要跟,賺蝕也與本人無涉,投資也很大風險,股票可升可跌,甚至可引致全數損失

2020年7月1日 星期三

月供股票考慮 (Jun 2020)


最近市場上不同股票既價格都有不同的表現,有些有故事的股票,超200倍的市盈率的股價都有出現了。加上各國的貨幣政策都在推高資產價格,我覺得有些股票的估值開始超過合理區了,有點危險。

(以下是小弟亂來的操作,千萬不要跟,賺蝕也與本人無涉,投資也很大風險,股票可升可跌,甚至可引致全數損失,資料僅供參考用途,在任何情況下不構成任何投資建議,只是小弟作紀錄之用)

1. 暫停月供港交所,港鐵,盈富
這個月的考慮因素在於每支月供的股票是不是在熱炒當中。在不少中概股回歸,市場對港交所的看法都好正面,令到股價不斷上升。好啦,我覺得已經升到貴既程度,所以我會停止月供港交所,先把本身月供的金額儲現金,等待下次機會再買,或者看看其他的投資機會。雖然只係供左港交所兩個月,但都係停一停先。有啲人會話,供供下停左,又話月供股票係平均成本法,唔怕買貴左既?如果你明知貴都供既話,同你望住隻股票52週高或者3年高都照入去有異曲同工之妙。

至於港鐵和盈富,在之前的大跌市中已經加注了,買入後各自佔股票組合的17%,所以先停一停。把資金轉到另一些股票當中,減少集中某一個股出風險情況。

2. 繼續月供長建,銀娛
另一方面繼續供啲海外業務較多的企業,令自己的股票組合不會只是集中在香港,所以會繼續供長建。公用股雖然有政策風險,例如政府對併購既控制,又或者經濟不景氣,令成本不能轉嫁消費者等等,都不要緊,因為這些都比投資其他沒有穩定收入既企業好,加上我著重它的股息帶給我的現金流而不是它在股價上的飛升。同時又可以分散投資到其他地區。

銀娛也是另一支會繼續的,也是自我感覺能把投資分散到不同地區,加上現時經濟不景氣,自由行的旅客人數下降,令大家對一些由旅客帶動的生意不太支持,令估值不會太高估。所以會繼續長期買入直至達到心目中設定的組合比例。雖然賺錢能力不錯,始終賭業的週期性較強,派息也只是特別息,能帶給我的現金流不太穩定,所以自己不會持有太多,反而會耐心等待橫琴的發展。也有點政策風險吧。

3. 整體考慮
至於月供股票的金額,都會保持在每月儲蓄的30-40% ,餘下的會儲起先。等待機會才用,因為沒有實體經濟的支持,股市波動在所難免,因為大家都在為資金找出路,有故事有利好消息的就會升到無朋友,沒有故事的就會被人沽到無朋友,所以在這些時候先留多一點現金在手上「坐一坐先」。

你可能會問,點解又留現金等機會,但同時又要繼續月供股票呢?點解唔停左月供股票,等熊市才買入?其實一邊月供股票,一邊儲現金的操作對我來說就好似「買大細」同時入注兩邊咁,唔會只係賭單邊。因為我唔會去估現時大市見底未,或者會不會再向下走。而月供股票就可以幫我一路買住貨先,如果大市再向下走再跌既,我又可以用現金加注。如果大市之後向上升既,我又唔會後悔自己什麼都沒有做,不會變成自己好似在跌市中咩都無做過而深深不忿。所以一面儲股票,一面儲現金令我在之後的路上有多點選擇。

希望大家在疫情中保持身體健康,在亂局中保持內心的平靜。

#資料僅供參考用途,在任何情況下不構成任何投資建議,只是小弟作紀錄之用,千萬不要跟,賺蝕也與本人無涉,投資也很大風險,股票可升可跌,甚至可引致全數損失

2020年1月25日 星期六

月供股票 (Jan 2020)

在 2020 年要好好安排自己的投資策略,不要再犯上一年的投資錯誤。在 2020 年中主要的策略都是以儲資產為目標,用月供股票方式,分注投資。因為中美貿易戰的第一階段協議已經簽署了,恆指和大市的氣氛都反映出來,恆指返回 28000 點左右。由於股票組合中,每隻的持股不算多,加上買入價都不算太低。即使有升幅但係賣出又會俾手續費蠶食回報。所以暫時無法進行部分減持的動作。在這個情況,根據之前既經驗,現在能做的是減少部分股票的月供金額,減慢入貨速度。繼續儲著股票先。等到恆指 29000 點以上睇情況再作打算。

再者,最近新型冠狀病毒感染肺炎的出現,都不免影響了市場的氣氛。相信都會令市場做成波動。面對波動的市場,我對自己有以下幾點的提醒,

1. 繼續保持月供股票,跟著恆指調整月供金額以 28000 點和 26000 點為階段分水領。在28000至26000點之間保持以下數值,在 28000 點以上再減少月供或者唔供住等一等先,如果跌低過 26000 點就增加月供。
2. 保留一部分現金,等待大跌市時買入。金額大約是足夠分兩注買入自己心儀的股票。因為不知道市況同股價會點樣變化,股價未到達心目中的價位就把資金留為下次。寧可錯過,不要買錯。
3. 只集中留意手上持股的消息和新聞,本身手上沒有的股票新聞會視為行業消息。暫時不會再增加手上股票的種類。 
4. 不要因為市場氣氛轉好而過份買入股票。
5. 肺炎的影響其實某些公用股的收入都係影響不大,但也捱沽。同時,以非業務為主的公司影響都是短期的,所以我會留意手上的這一類股票有沒有過份賣出。

(以下是小弟亂來的操作,千萬不要跟,賺蝕也與本人無涉,投資也很大風險)

以下係調整之後的月供分配,


最後睇下暫時個組合的分配,

更重要的是,希望新型冠狀病毒感染肺炎的情況有所改善,不要歷史重演!辛苦各位醫護人員了!大家都要做好自身的防護,戴口罩!洗手!洗手!洗手!天佑香港!

#資料僅供參考用途,在任何情況下不構成任何投資建議,只是小弟作紀錄之用

2019年11月4日 星期一

月供股票考慮 (Nov 2019)

在這個 blog 裡,本身不太想講自己的投資操作。因為我覺得這事好個人,只是想紀錄一下自己學習到的投資概念和一些生活上的事情。唔想影響到其他人既投資決定,怕害到人。自己買錯野,自己做錯決定就算了,唔好影響到人。但睇完雲地兄的書之後,還是很想紀錄一下每個投資決定,無論是對是錯,都好好紀錄一下,方便以後自己可以睇返,看看自己的投資決定有沒有做錯。同時打出來會方便整理思緒,感覺上,自己的書寫能力很差,希望大家多多包容。

之前的月供金額都沒有什麼對策,只是簡單的用相同金額入貨,運用最簡單的平均成本法。但參考了其他 blogger 的經驗,原來月供股票都可以有技巧可言。簡單來說就是按市況調整月供金額。

1. 市況好時,恆指水平偏高,減少月供金額。
2. 相反,市況不好時,恆指水平偏低,增加月供金額。
3. 加上判斷當時熱炒中的板塊加而避開,減少月供金額,甚至賣野。

過去幾個月既觀察,每當中美貿易戰有新消息都會影響股市既氣氛,反而市場好似已經對香港既社會運動沒有太大的反應。這幾天中美貿易戰剛剛傳出談判有進展既消息,恆指重上27000 點。雖然唔知呢個消息可以持續幾耐(如果有跟進過既師兄都知,有機會突然間又話談判破裂),但感覺上市場氣氛比之前好了。

因為月供股票的設定是有截止日期的,所以要在截止日前決定好月供金額。就住呢個情況,我決定減少月供股票的總金額,每月留返多少少現金,等待氣氛轉差時再投入資金,或者撞正真正的大跌市來到時,可以多少少現金買野。如果下個月恆指又跌破25000 點,或者某一隻月供緊既股票有短期不利消息時,會相對調整加大返月供金額。因為調整月供金額係不用收手續費的,所以每個月不同金額都可以,又可以選擇一次性放一舊錢落去,只要每個月在截止日前〝睇餸食飯〞就可以了。

另一方面,今個月開始考慮下股息再投資既操作應該要點做,雖然這個考量跟上面既決定是背道而馳的,但我想想兩者可以一同考慮。因為只是左袋定右袋拎錢出黎既問題,只要自己的試算表列好,其實是沒有影響的。小弟的月供分佈比例如下,

(以下是小弟亂來的操作,千萬不要跟,賺蝕也與本人無涉,投資也很大風險)


因為之前盈富是一手手買的關係,持股數量比起組合內其他的股票都要多,所以月供部分暫時會較少一點。盈富的特色同好處壞處就不用多講,大家都應該很清楚,所以我還是會不間斷咁慢慢入,少少地都會供住先。

至於其他股票的金額基本上差不多,因為現時的目標是建立一個平衡組合為先,同時盡快增加每隻股票的持股數量,以免派息被手續費蠶食得太多。

另外,今個月既操作係第一次考慮股息再投資的部分。因為之前所收到的股息唔多,而且又未考慮好應該要點做先可以有最岩自己既效果。暫時選擇左放落工行,先提高現金流先。雖然內銀股有股息稅,但它算是在組合中,能夠用月供方式買,而股息率接近5% 的一隻。(組合中還有其他收息股,不過無得選擇月供)

剛剛可以在除淨日前用完好用了我所收的股息。我的目標是現金慢慢轉成資產,過程中先增加現金流,以免將來因為現金流不足而要賣資產。

#資料僅供參考用途,在任何情況下不構成任何投資建議,只是小弟作紀錄之用