想轉變一下

已經很久沒有寫下自己既想法。因為工作上的事和人都已經佔了生活上的一大部分, 想不到自己這幾年轉了部門之後, 對自己的影響是那麼大, 一方面是身心的影響, 另一方面是情緒的影響。不過現在回想起來, 自己還不後悔會當時的決定。因為沒有踏出這一步, 自己應該都一直不會轉變。

說到這裡, 這幾年內自己都不斷的睇中醫調理, 希望可以讓自己休息好一點, 訓覺好一點。每次都看醫師都會同我傾下計, 雖然一開始會有壓力, 不過慢慢醫師都接納了我這個沒有太多能量既人。最近她提議我, 不如也自己的心情和經歷都試試寫下來。希望會對自己的情緒有幫助。

所以自己想轉變一下這個 Blog 的內容, 不只是紀錄自己的投資想法, 還會寫一下自己由初步入管理的一些經歷和感受。雖然自己的經歷在其他人眼中可能是很小的一件事, 不過對我而言是一個成長過程和生命中的經歷。希望當中對自己的經歷有些反思的部分, 也可以算是一個情緒的出口。

工作上的轉變由一個工程師到管理者的階級對我來說真的很大, 以前可以自己落手落腳做, 到現在不是自己做, 由別人去做自己做 review, 過程中最難踏出的就是信心問題。加上公司在改制度, 所有事件都必須要有清楚的背景和支持, 在這裡工作了很久的同事很不習慣, 也有很多師傅格和很要面子的下屬。和他們相處應該是自己一直以來的難題, 慢慢在這裡紀錄一下自己的想法, 醫師特別提醒自己不要有壓力, 想寫什麼就寫什麼, 不要再用心神整理了。不過我覺得自己要整理情緒, 都應該要先整理好自己在面對的事情是什麼吧。我希望自己不會講得太混亂, 就由今天開始吧!

投資路上小記

最近看看，原來上一次打 Blog 記錄自己的投資想法已經是兩年前了。在這兩年裡，自己一邊忙著工作的事，一邊都有留意著股市。因為自己不太懂得美股，所以我只是留意香港的股票為主。雖然現在很多人都沒有再留意港股，但我了解自己的認知，希望只是在自己認識的範圍內投資。在這兩年裡，買入和賣出的次數比之前的多了很多，主要是因為轉換投資組合的成員，把一些細隻的二線股，換成其他一線的收息股。

本身自己手上有不少房託作為收股息的作用，不過現在看見不少商店結業，這是一次的汰弱留強的過程。我的想法是店舖的價值還是有的，例如一些在黃金地段的商場，以前的零售市場旺盛，令租金上升，令一些細型商場的租金也上升了。但是當市況逆轉，有實力的租客也會轉租一些比較好的地段。所以租金在好的地段應該會較先回穩。

就趁著這個機會把投資組合換馬成更好的質素，或轉換為一些綜合企業，雖然現在的大環境對鋪租收入不太順境，但我覺得租金收入不是企業的唯一收入，企業收入分散，那麼影響就不會是致命性的。情況就像收息組合分散在不同行業，那麼其中一個行業在逆境中，也不會令整個組合受影響。

另一樣想說的是，自己掌握多了賣出時間的決策和執行力。之前試過兩次錯過了賣出的機會。就是在股價突然大升，而不是因為剛剛公佈了很好的業績。那麼就要考慮一下賣出一少部分。第一次是在2023年炒過關時，有些個股會因為這個消息而大升。因為大家預計會很多人外出旅遊，令旅遊相關的企業預計收入會比疫情時期有改善，所以搶先買入，超前部署，期待轉勢。但炒風過後，業績還未公佈，又再跌回原來的價格。這樣一來一回，紙上富貴。反而心情卻被牽動得大上大落。

股價上升時，又覺得自己眼光不錯，是價值投資的就不要因為股價短期波動而心急賣出。生怕沒有機會在低位買回，自己捱了這麼久都值得。相信股價還可以繼續上升。還是先等一等，不要心急賣出。

但當股價開始轉下，自己又會想，反正沒有在高位賣出，而又不知道業績好壞，不如先等業績再作打算。是價值投資的就不要著眼短期波動，要長期持有。

當然，最後業績出來，結果也是不好的。但是反思上面的心理過程，其實自己根本沒有想好買入賣出的策略，更沒有想好在這支股票上等待的是什麼。因為一開始沒有一個清晰的買入原因，更沒有仔細想好買入賣出的計劃。如果股價突然大升，但不是因為有很好的業績支持，那麼就應該考慮減持一部份。經歷多了幾次這些心理戰，在往後再遇到這些情況時可以做好心理準備，繼而行動。

收息組合的成員

自己的收息股都是重資產的行業和公司，每間公司定時需要投入大量資金作資產更新，或者加大投入資產以達至公司的投產量提升。

資產更新是可以預期的事，但是當投入資金的時候，就會減少公司的現金，減少派息。如果想要維持原本的派息，就要考慮銀行借貸、發債、配股或供股。即是說企業要保持派息，就需要好天收埋落雨柴，在公司保留一定的現金，用來應付資產更新的資金需求，或者是維持派息的資金。

如果自己組合中的收息股都是重資產的企業，就有機會在它們作資產更新時減少派息。比較好的情況是，它們在不同時期作資產投資，組合的現金流不會減少太多。更差的是，如果它們都剛好在同一時期減少派息，就會令整個組合的現金流下降，可能會令自己失去預算。反之，在企業投入資金作資產升級時，可能是一個儲貨的好時機，靜靜地等候公司完成資產更新後，派息和股價回勇。當然這個結果的一大前提是，公司管理層對派息方案的決策。

因此，會考慮在組合中加入一些不用定期投入大量資金作資本開支的公司作為收息的一員。

重整投資計劃的想法

最近聽咗好多唔同市場上面嘅聲音，有好多人有自己獨特嘅見解，唔同嘅睇法。聽吓聽吓自己不其然會諗，其實邊一個先啱呢？我想大家都經歷過不斷聽不同嘅 Youtuber, KOL 嘅分析，聽下聽下會唔知自己做緊咩，一個話升一個話跌，一個前日話升，過幾日話 Sorry 數錯咗波浪。Well, 問返自己究竟我聽咗啲乜嘢，突然間醒覺返，自己好像慢慢變了聽貼士的一群，聽人講多過自己想清楚自己應該怎樣做投資。

之後睇返自己之前寫嘅 blog，搵返自己之前嘅投資心態。重新整理下自己嘅諗法同方向，

１。 以儲資產嘅角度，增加現金流

２。不強求低買高賣 （不用炒賣心態）

３。只投資自己認識嘅股票 (最好是日常生活接觸到的)

感覺上用這樣的想法，可以去掉很多諗法，個人都可以靜返落嚟再梳理下自己真正想要個點樣嘅投資組合同落實方法。最近好多唔同嘅聲音，你又聽咗啲乜嘢？係令自己清晰咗定係亂咗？

市場氣氛不好，經濟環境不好，每個公司都面對不同程度的困難，每間公司都有壞消息同不利嘅故事可以講。我自己就決定睇多一點公司盈利能力同之後嘅發展潛力做選擇。同埋唔好怕買完即跌少少就馬上止蝕離場嘅諗法。（止蝕係需要的，只是在基本面改變既時候，而不是在一天兩天的股價波動）其實有很多個股都跌了很多，只要盈利能力沒有大變，其實可以放心買入或持有。因為當過後幾年，事過境遷之後，強的企業的轉勢會比其他的企業快。所以上一次打 Blog 時都有寫過自己的想法，就是在這個股市大跌的時機下換股，把手上的一些不太好的股票換走。思想的方向是

〝在風浪中，那些企業還可以生存，等待到大環境改善的一天？〞

〝在風浪平靜過後，那些企業的賺錢能力會回復？〞

〝在風浪中，自己個人的現金流情況如何？〞

對應這三個問題，我自己會選擇以分注的方式買入科技股及收息股。

在風浪中，可以生存到最後的一定是現金流強的企業。某些大型又有盈利的科技股現金流很強，它們最有能力捱過去。在美元轉勢的時候，它們就可以有平資金加快發展，那時就會開始有投資的資金追捧（有故事可以講）。所以為了準備那個時候的出現，現在慢慢開始分注買入。

另一方面，收息股也是另一個嚴重下跌的區域。有好些股票價格都因為債息上升而下跌不少。有好些股息是因為大家預期會減派息而先行下跌。在這種情況下，我會選擇分注買入一般盈利有保障的公司，（例如公用，或者有其他原因一定會派息的企業），即使它在這一年或兩年減多少派息，只要它在風浪過後能生存下來，回復原來派息的機會一定有。我們就是要等待那個時間。也有些公司在逆境中說會保持派息，那些個股也不是買入的時候，因為被別人當成救生圈了。現在才追入反而不好。

最後，當然要留意下自己個人的現金流，不可以用盡所有資金去買入股票。

在過去的日子裡，我都聽左好多市場上的分析，因為工作很忙，很想節省自己做功課既時間，變成聽貼士的一群。但反而覺得愈聽愈亂，失去了自己的靜心思考，失去了自己的節奏。你在這個風浪之下又有作一個怎樣的投資計劃呢？

為換馬做準備

最近考慮投資上嘅方向之後，檢視了自己手上的組合，感覺上需要整理一下。以下只係自己嘅虛擬組合作出嘅操作，不構成任何投資建議或邀約。在這種咩股都跌嘅情況之下，選擇咗賣出銀娛，盈富，置富。其實自己都想好了會換碼去邊幾隻股票到，在這𥚃想記錄返幾隻股票自己嘅買入初心同埋賣出原因。

1．盈富基金
首先是盈富基金，本身買入佢嘅諗法只係同大市同步，又會被動咁派股息。因為佢會被動式咁選最好嘅50只股票納入基金，不過近年來佢哋操作同埋規則有所改變，例如喺科技股最高位嘅時候將佢哋納入恆生指數，睇返佢哋嘅選股機制，發現原來佢哋嘅選股唔係被動選擇而係人為選擇。咁即是未必同一把尺，像以往一樣去選股到指數。另外，指數成份股嘅數目增加令到納入指數入面嘅股票數目變多，就好似之前文章所講嘅增加大學學位令到所有人都係大學生的比喻。即係將龍門擴大，令多啲公司可以入到指數，即使佢哋嘅盈利能力或市值未達到客觀嘅要求。這樣跟我本身買被動型基金嘅初心已經有所唔同，所以決定同佢講拜拜。可能我已經喺動作比較慢嗰個啦，哈哈。在大市咁差嘅情況之下賣出，可能係一個蝕本嘅操作，不過我相信而家唔止蝕，往後對佢嘅期望都唔會太大。

不過，盈富基金俾我有一啲學習嘅地方，就係需要分辨大市嘅平同埋貴而作出買入賣出嘅策略，而唔係單純咁係儲股票。例如因為中美貿易戰嘅利好消息而令股價短時間（1至2個月內發生）急速上升，呢個時候應該賣出及停止月供股票，等待下一個時機。就係等市場冷靜返，或者下一個壞消息出嘅時候就會回落。到時候先繼續月供股票。如果急升嘅時候咩都唔做嘅話，就會只係紙上富貴過，過眼雲煙。

２．銀河娛樂

另外就係銀娛，本身買入時看好佢在澳門橫琴嘅土地儲備，往後澳門要發展嘅時候，佢應該會係最受惠的一個，加上佢續牌應該唔會有政策風險，而且賭業係好賺錢嘅行業，因為賭仔十賭九輸呀嘛，咁梗係買佢對家啦。同時銀娛之前嘅酒店娛樂發展項目都做得唔錯，所以都想過長遠持有，等待橫琴發展嘅一日就係收成嘅時間。

不過現在大環境上有不同，整體嘅經濟變差，拎去娛樂或者賭博嘅錢，未必會有以前咁多。再者企業要發展新項目就需要借貸，在加息週期嘅舉債都係不利的，等佢減息借到平錢發展。雖然銀娛嘅現金儲備都好多，不過大環境暫時好似唔係好就佢。其實我都幾中意呢一只股票，覺得佢都仲係好有發展嘅潛力，不過現在大環境咁嘅時勢，呢隻股票喺我個組合入邊並不牆身現金流。與自己目前的投資目標（增加個人現金流）唔係好配合，所以都要跟呢只股票講有緣再見啦。遲下再睇有冇機會買返。

呢一隻都有操作上學習嘅地方，喺年初炒通關嘅時候佢嘅股價短時間上到去70幾蚊，果時自己又係蠢咗，咩都唔做，明明知道佢係一個急升，都只係坐喺度，沒有操作。變成曾經嘅紙上富貴，好蝕底。

３．置富信託

最後就係置富信託，其實買入嘅初心真係為咗收息，因為佢嘅業務好簡單，就係一隻收租嘅股票，加上佢以信託形式上市，一定會將可分派現金嘅九成派發出嚟作為股息。佢旗下好幾個商場物業自己都有不時經過，雖然唔係話好旺場，但自己就中意佢嘅定位在民生商場同埋停車場多，唔係一啲寫字樓嘅資產。當時買入嘅時候都有六釐息，自己都幾滿意個回報嘅。買咗佢就當自己係一個收租佬，唔會理股價升跌炒出炒入。係組合內一隻增加現金流嘅股票。

不過大環境係加息週期 收息股都會跌落嚟，除咗置富信託之外，好多收息股都跌咗好多，我會諗吓其實同一筆資金係唔係有其他更好嘅股票可以買入作長線投資呢？諗返置富嘅加租能力其實比起其他大型商場比較低，而且有啲重點商場仍然喺度翻新緊，其餘商場嘅質素比起其他大型商場又冇咁好。咁即係話當個經濟逆轉嘅時候，其他商場嘅租金升幅會俾置富更加大，議價能力都俾佢高。我覺得唔應該死守呢一只信託股票，而應該換碼去其他更加好既股票等待市場逆轉嘅時候。

即係加息見頂或者開始減息嘅時候，其他更大型嘅信託股票或者地產收租股，升幅及回報應該更加大。可能外資返嚟嘅時候，其他更優質嘅股票升幅應該會比置富更好。

呢只股票都學識咗一樣嘢，就係要睇佢升既原因係咩。仲好記得快當時第一次買入嘅時候咁啱喺中美貿易戰發生緊，所有嘅收息股或者主要收入喺香港或者中國內部就搵會升曬上去。因為個個都驚唔知道美國有咩手段再打壓，市場嘅避險情緒好高， 所以資金流入去呢一啲簡單嘅收息股，其實當時呢個買入決定係錯，因為時機係唔啱。應該等個市場唔係焦點在呢種類股票嘅時候先慢慢買貨。

整體考慮

自己都諗好咗投資目標，就係要增加個人現金流，現在好多股票都跌咗落嚟，好希望喺加息嘅週期入面儲多一啲有穩定盈利又會派發股息嘅股票，坐住等下一個減息週期。「儲資產，增加現金流」做好防守個一部份當然，令資金回籠的速度增加。在往日子即使要買些增長股出錯了都還有返生的機會。沒有一間企業可以應承你有穩定嘅盈利同穩定嘅派息，事情總會有黑天鵝事件，所以只可以喺注碼上面控制好，考慮自己可以承受嘅風險有幾多。當然我都諗抽一小部份嘅注碼出嚟，買入啲大型嘅科技股，因為佢哋就係下一個減息週期嘅受惠者。

＃資料僅供參考用途，在任何情況下不構成任何投資建議，只是小弟作紀錄之用，千萬不要跟，賺蝕也與本人無涉，投資也很大風險，股票可升可跌，甚至可引致全數損失

好耐都沒有更新對投資的想法

時間過得真係快，原來對上一次寫低自己投資既心路已經是一年前了。我並沒有放棄對股票投資或者清倉，只係因為上年的下半年度自己轉了新工作加上在處理結婚事宜。很多時間和精神都在放了在其他地方。在完成了結婚這件大事之後，聽下最近市況同周邊的聲音，令我自己都有些很深刻的感受，想紀錄一下。但係每次可以靜下來寫既時間不多，可能分開幾次寫。

在加息周期裡，很多公司的估值都跌了很多，特別是收息股，增長股。還記得之前自己剛剛開始買股票時, 有一段時間常常覺得那些好的收息股成日都唔跌，重是去到某個股息率就會有人買，那時就用月供股票方式買入。同埋啲增長股都唔跌，沒有機會買入。反而去到現在，那些股票的價格都比之前跌左唔少，令我都諗下其實係唔係一個買入機會？咁佢地跌既原因又係咩呢？

在低息環境，錢放左銀行只係收到較低既利息，所以大家都會買啲收息股，增加現金流回報（好過放係銀行)。不過加息周期，成個大環境唔同左，有錢既人都會想放錢係銀行，唔洗受其他風險（例如買股票既會諗個股有機會減派息，或者資不抵債，所以會選擇賣出股票而轉做債卷或者短期既定期存款，等待下一個周期）

不過收息股的價值是在公司業務盈利產出自由現金流產再按管理層決定派息比率而生成給股東們的現金流。在加息周期，公司要留現金防身而減派息都好正常，如果只係怕減派息，而令佢地股價下跌，會唔會係一個好既買入機會呢？

係呢方面我試試分享一下自己既睇法，

１。加息減息，ＱＥ或者縮表都係一個周期

在過去幾年認識多左左美國ＱＥ令資產價格上升既關係，對經濟的影響，美元債的息率對股市影響。在之前低息時間，先要保著本金，再要多搵投資機會，利用平錢安全地槓桿投資。在加息周期，先要保著自身現金流，再搵投資機會等待下一次既減息周期會升值既野。我覺得穩健既收息股（現金流強又會派息既公司）其實就係其中一樣。

２。有些收息股以前是舉債維持派息，或者用提高派息比率來增加派息。

呢一種公司在高息環境裡理應會減派息，而股價下跌。其實這類的收息股我自己不太喜歡。因為股息不是由公司的盈利派出黎，在加息周期唔會用新債還舊債，就會好可能要賣資產還債或者派息。咁樣做法會影響到公司之後既盈利能力，所以唔應該揀。

３。有些公司是因為要留現金準備之後的債務還款而減少派息。盈利能力沒有變。

這些公司如果業務盈利不是有太大的變化，只係因為利率問題而跌，我反而覺得可能是一個慢慢收集的機會，等待下一次的減息周期。要等到幾時我都唔知道，我會揀一啲公司有穩定收入既， 應該可以支持到那個時間。例如收租既，生活必須品，國家在推動經濟時會幫助佢地既公司，我覺得資產只係因為無風險利率提升而令佢地沒有資金追捧。

４。唔好夾難買啲自己沒有留意開既股票

在 Youtube 上，有不少提出中特估 concept 既影片，解釋點解某些股票有個別的特色做估值，例如之前大家都講既藍燈籠，在我學習股票投資初期都聽過呢個名字，現在睇返真係市況又真係幾 match。講真，公司現金流強勁係真的，又肯派息，其實都係一個好選擇。但係我自己之前沒有留意開呢間公司，反而我會問自己呢間公司既業務盈利，係唔係真係在加息周期中可以增長咁多，而令到個價值上升到這個地步？坦白講，我都會收集這種類型的股票，不過認識唔係咁多，又係市場現在熱捧，所以我自己唔買住。我反而更加想藉著呢個時機收集啲之前想買，但未有機會買的股票，以儲資產的角度提高之後的被動收入。

５。要有自己既計劃，打出自己既節奏

我睇返轉頭，投資係好需要一個目標（例如組合要達到年息６％回報），再有一個計劃（例如分開幾多隻股票，每一隻股票買入幾多，預期派幾多息），之後執行（例如儲錢等待機會買入，或者股票跌到你心目中價位換馬買入）。到最後睇下自己係唔係達到投資目標，其實都會好開心。但係以家好多人在不同地方分享自己既投資成績幾好幾好，自己睇到就覺得唔開心，點解同人地差咁遠，就好容易跟紅頂白，聽ｎｕｍｂｅｒ做買賣。到最後唔知自己做緊咩野。

雖然我讀書時沒有讀過其他經濟有關既野，但是很多謝一班Ｂｌｏｇｇｅｒ無私分享，令我學識到書本以外既世界，原來係咁樣運作。令自己有財務自由既諗法。

思考投資方向

過去一年多沒有打 Blog, 也反映了自己在投資上沒有什麼操作。也沒有留意投資的事。

主要原因是因為自己剛好儲夠了首期, 想著和女朋友可以有一個家, 忙著處理結婚買樓的事宜。當自己知道要開始供樓，基本上都沒有多餘的錢去做投資。心裡總是想著留多一個錢, 有多點錢準備買傢私電器, 裝潢, 等等...

所以沒有閒錢就沒有再想投資的事了，甚至有時要賣出股票換取現金，不過這也不代表我把股票全都賣掉，只可賣出了一部份。所以現在處理好大部份的支出後, 就開始會想回投資的事。

看到現在是加息的周期，供樓嘅浮動利息有可能會增加，就想一想自己的投資方向應該要點樣做。

回想返一句止凡兄在書本裡的分享, "投資其實係一個計劃"，我都反問自己的目標和計劃是怎麼樣？

當下第一個感覺就是 "要增加被動收入"。

因為又要供樓, 又要生活, 又要照顧家人, 其實財政支出的壓力也好大。看著戶口的增長慢了很多, 心裡就有點不安定。

但我知道只是儲現金又會掉進去窮人的迷思, 所以我一定要保持著儲資產。之後我望一望現在投資組合內的股票，突然另外有一個感覺，就係股票數目太多。有的是收息股，有的是增長股，有的兩樣也不是。自己看來也不太知道這個組合的目標是想做什麼，好像包羅萬有的。

當下的感覺就想把組合重新整理，調整成為專注其中一個目標。主力是收息，其次是增長型的，兩邊也不是的就會轉走。特別是一隻被動指數基金，現在看回當初買入的理由，跟現在那隻指數基金正進行嘅事有好大出入。

例如初時他會把最強的股票放入去指數內，汰弱留強，但現在股份數目增加，又放寬了納入指數的上市年期，相當於 “調整了” 門檻。

令我想起以前老一輩常常說，我們那個年代要進大學一定要係尖子先至入到，現在這麼多大學，要進大學就容易很多了，現在一街都是大學生。

再想一想，這隻被動指數基金要升的話，應該要被納入指數內的股票全都上升才會有起色。如果只是部份的股票上升部份的股票下跌，對指數的整體表現沒有什麼影響，只會浮浮沉沉。

我並不是說這隻被動型基金不好，只是不太合適自己的投資目標。這種被動型的基金有着一個好處，就是不會因為單獨一支股票消息而大升大跌。

在現在的投資環境，很多不美好的消息出現，可能反而是一個機會吸納長遠盈利能力不錯的公司。清楚知道自己的投資目標和方向，雖然有些股票是蝕住賣，但係不合適就無謂藕斷絲連，早日賣出轉入喜歡的股票吧。

現在回想返，自己一路走來的投資成績都麻麻，可能跟自己組合的目標不太清晰有關。就藉著這個機會作出調整吧！